as voces da casa

en verán tamén falan

2009-09-17T09:34:00.002+02:00

está rematando o verán e preparámonos para un novo curso.
mentres tanto, as voces da casa seguen dicindo cousas.
nestes días incorpórase un novo blog, o de mariola hermida.
podedes facerlle unha visita e deixarlle un comentario. estará encantada de recibirvos na súa nova casa.

na galaxia imaxinaria (fin de curso)

2009-05-25T15:15:00.004+02:00

o pasado venres inaugurouse en fene o parque da galaxia imaxinaria. un espazo diferente para estar ao aire libre e non ser só expectadores.

ten un pequeno anfiteatro (cunha acústica asombrosa) onde aproveitamos para facer o noso habitual recital de fin de curso e presentamos o número 6 d'as voces da casa, a publicación anual con textos dos participantes no obradoiro, este ano adicados a conmemorar o centenario do nacemento de xosemaría pérez parallé.

aquí tendes uns exemplos de participantes do obradoiro lendo os seus textos.

e o orgulloso director da orquesta.

recital de fin de curso

2009-05-22T10:27:00.001+02:00

hoxe ás 18:30, no novo parque da galaxia imaxinaria, teremos o noso recital de fin de curso e presentaremos a nova edición d'as voces da casa, a nosa publicación anual cos traballos dos participantes do obradoiro.
este ano é unha homenaxe a xosemaría pérez parallé no centenario do seu nacemento.

copio aquí uns fragmentos do texto de presentación que escribín para este exemplar da publicación.

Pasou un novo curso e foi diferente. Este ano incorporáronse ao grupo varias persoas con ganas de aprender e traballar. Aire renovado que nos encheu de enerxía.
Tamén este ano incluímos nos obxectivos do obradoiro unha serie de actividades novas: arredor do blog «as voces da casa» empezamos a fabricar as nosas propias bitácoras. E pouco a pouco van nacendo estes espazos que facemos públicos en internet e onde amosamos o noso traballo e dá a volta ao mundo.
O asunto promete e para o curso que vén seguiremos profundizando nesta liña.
A Biblioteca Municipal de Fene que nos acolle cada semana leva o nome de Xosemaría Pérez Parallé. Neste ano, no que celebramos o centenario do seu nacemento, o Obradoiro Literario non podía permanecer alleo. Parallé é unha figura que significa, para todos, un exemplo de compromiso coa lingua e a literatura de noso, coa súa difusión e promoción, co seu coidado e mimo.
A proposta de traballo foi a seguinte: cada un escolleu un poema de Parallé e, a partir da idea central do texto, escribiu un traballo de seu. Nesta edición d’as voces da casa, tentamos que as dúas voces dialoguen poñéndoas unha a carón da outra.
Non é doado atopar edicións da poesía de Parallé. Xa que logo, as voces da casa significa este ano, tamén, un agasallo para as xentes de Fene dun pequeno feixe de poemas do «Segrel do Penedo» escollidos por cada un de nós. Unha modesta contribución á difusión da obra do mestre.

pequenas paisaxes

2009-04-23T17:49:00.003+02:00

o venres pasado, no casino de fene, asistimos á presentación de pequenas paisaxes, da nosa compañeira matilde castro.

o libro, publicado na colección libros da frouma, da librería compostelá follas novas, inclúe un medio cento de haikus escritos por matilde ao longo do curso 2006-2007 do noso obradoiro literario.

aquí tendes algunhas fotos do evento.

o alcalde de fene, iván puentes, contou a súa lectura do libro

e matilde leu algúns dos haikus

con acompañamento de guitarra

máis alá da calidade dos haikus de matilde, o acto foi emocionante sobre todo porque estivo feito dende o aprezo que todos lle temos.

como comprenderedes, todas as persoas que temos algo que ver co obradoiro estamos felices de poder compartir este momento con matilde.

noraboa a matilde e moito ánimo aos demais. é posíbel!!

día da muller traballadora

2009-03-06T10:15:00.002+01:00

hoxe participaremos no recital que cada ano organiza o concello de fene arredor do día da muller traballadora.

eu penso ler un poema que escribín para o libro Polifonías II

en sargadelos ferrol

2009-02-24T17:45:00.002+01:00

a próxima sesión do obradoiro (o día 27 de febreiro) terá lugar na galería sargadelos de ferrol.

será unha sesión aberta na que terá lugar a presentación da edición en papel d'os veos da paisaxe na edición que fixo antonio piñeiro en bourel.
o editor estará presente para contarmos como é este asunto de facer edicións artesanais, haberá un pequeno recital poético e os asistentes que o desexen poderán participar dun pequeno exercicio de escrita poética a partir das fotografías da exposición.

o obradoiro no círculo

2008-11-23T18:05:00.000+01:00

como sucede habitualmente dende hai uns anos, algúns dos membros do obradoiro literario participaron da homenaxe que o círculo mercantil e industrial-unidade de fene fai a xosemaría pérez parallé.
como novidade, arsenio iglesias pazos que andaba de visita por aquí fixo de presentador do acto.

alfredo ferreiro no obradoiro

2008-11-10T09:59:00.002+01:00

o venres pasado visitounos no obradoiro alfredo ferreiro.

alfredo é autor do libro que o ano pasado obtivo unha mención publicación do xurado do premio nacional de poesía xosemaría pérez parallé.

este ano viña a fene para participar da reunión do xurado do premio e aproveitamos para convidalo a compartir connosco unha sesión de obradoiro.

foi unha sesión diferente na que non había moito texto para comentar así que fixemos un par de xogos de escrita que remataron con varios poemas individuais e tres poemas colectivos escritos coa técnica do cadáver exquisito.

alfredo publicou esta fin de semana un post no que conta a súa experiencia no xurado do premio e a súa visita ao obradoiro, e incluíu o poema que escribiu connosco na sesión.

presentación

2008-11-07T10:21:00.002+01:00

anunciamos a apertura das portas desta casa.

"as voces da casa" é un grupo de escrita creativa que se reúne para xerar ideas, fabricar produtos literarios e outros artefactos multimedia, discutir os resultados e explorar en conxunto.

o obradoiro ten lugar en fene (galiza) dende hai xa varios anos pero, a partir de agora, inicia esta nova andaina na rede.

esperamos as vosas visitas e os vosos comentarios!